‘கடைசி உலகப் போர்’ படத்தின் ஓடிடி ரிலீஸ் அப்டேட்

ஹிப் ஹாப் ஆதி நடித்திருந்த கடைசி உலகப் போர் படத்தின் ஓடிடி ரிலீஸ் குறித்த அப்டேட் வெளியாகியுள்ளது.
ஆரம்பத்தில் ஆல்பம் பாடல்களின் மூலம் ரசிகர்கள் மத்தியில் பிரபலமானவர் ஹிப் ஹாப் ஆதி. அடுத்தது இவர் அரண்மனை, ஆம்பள, தனி ஒருவன் போன்ற படங்களுக்கு இசையமைத்து பெயர் பெற்றார்.

அதேசமயம் நடிப்பதிலும் படம் இயக்குவதிலும் ஆர்வமுடைய இவர் மீசைய முறுக்கு என்ற திரைப்படத்தை தானே இயக்கி நடித்திருந்தார். ரசிகர்கள் மத்தியில் இந்த படம் பெரும் வரவேற்பை பெற்றது. அதைத் தொடர்ந்து நட்பே துணை, நான் சிரித்தால், பிடி சார் என பல படங்களில் நடித்திருக்கிறார்.

மேலும் இவர் ஹிப் ஹாப் தமிழா என்டர்டெயின்மெண்ட் என்ற தயாரிப்பு நிறுவனத்தை தொடங்கி அதன் கீழ் கடைசி உலகப் போர் எனும் திரைப்படத்தை தயாரித்திருந்தார். இந்த படத்தை இவர் தயாரித்ததோடு மட்டுமல்லாமல் இந்த படத்தை இயக்கி, நடித்து, இசையமைத்திருந்தார்.

போர் தொடர்பான கதைக்களத்தில் உருவாகியிருந்த இந்த படம் கடந்த செப்டம்பர் 20ஆம் தேதி திரைக்கு வந்தது. மிகுந்த எதிர்பார்ப்புகளுடன் வெளியான இந்த படம் கலவையான விமர்சனங்களை பெற்றது. இந்நிலையில் இந்த படம் வருகின்ற அக்டோபர் 25ஆம் தேதி டென்ட் கொட்டா ஓடிடி தளத்தில் வெளியாகும் என அறிவிக்கப்பட்டுள்ளது.

மேலும் ஹிப் ஹாப் ஆதி, கடைசி உலகப் போர் படத்தின் இரண்டாம் பாகத்தை உருவாக்க திட்டமிட்டு வருகிறார் என புதிய தகவல்கள் சமூக வலைதளங்களில் வெளியாகி வருகிறது என்பது குறிப்பிடத்தக்கது.