சஞ்சு சாம்சனின் அதிரடி வீண் – ராஜஸ்தான் அணியை வீழ்த்தியது டெல்லி!

ராஜஸ்தான் அணிக்கு எதிரான போட்டியில் டெல்லி அணி 20 ரன்கள் வித்தியாசத்தில் அபார வெற்றி பெற்றது.

17வது ஐபிஎல் கிரிக்கெட் தொடர் கடந்த மார்ச் மாதம் 22ம் தேதி தொடங்கியது. இதுவரை 55 லீக் போட்டிகள் நடந்துள்ளன. நேற்று 56வது லீக் போட்டி நடைபெற்றது. டெல்லி உள்ள அருண் ஜெட்லி மைதானத்தில் நேற்றிரவு 7.30 மணிக்கு நடைபெற்ற 56வது லீக் போட்டியில் ரிஷப் பண்ட் தலைமையிலான டெல்லி கேப்பிட்டல்ஸ் அணியும் சஞ்சு சாம்சன் தலைமையிலான ராஜஸ்தான் ராயல்ஸ் அணிகளும் பலப்பரீட்சை நடத்தின.

இப்போட்டியில் டாஸ் வென்ற ராஜஸ்தான் அணியின் கேப்டன் சஞ்சு சாம்சன் முதலில் பந்துவீச்சை தேர்வு செய்தார். இதனைத்தொடர்ந்து டெல்லி அணி முதலாவது பேட்டிங் விளையாடியது. தொடக்க ஆட்டக்காரர்களாக களமிறங்கி அதிரடியாக விளையாடிய ஜாக் பிராஸர் மெகர்க் 50 ரன்களிலும் அபிஷேக் போரேல் 65 ரன்களிலும் ஆட்டமிழந்தனர். அடுத்து களமிறங்கிய சாய் ஹொப் ஒரு ரன்களிலும் அக்‌ஷர் பட்டேல் 15 ரன்களிலும் ஆட்டமிழந்தனர். கடைசியில் அதிரடி காட்டிய டிரிஸ்டன் ஸ்டப்ஸ் 20 பந்துகளில் 41 ரன்கள் எடுத்து ஆட்டமிழந்தார். இறுதியில் அணியானது 20 ஓவர்கள் முடிவில் 8 விக்கெட்டுகள் இழந்து 221 ரன்கள் குவித்தது.

பின்னர் 222 ரன்கள் எடுத்தால் வெற்றி என்ற கடின இலக்குடன் ராஜஸ்தான் அணி இரண்டாவது பேட்டிங் விளையாடியது. தொடக்க ஆட்டக்காரர்களாக களமிறங்கிய யாஷ்வி ஜெய்ஸ்வால் 4 ரன்களிலும் ஜாஸ் பட்லர் 19 ரன்களிலும் ஆட்டமிழந்தனர். அடுத்து களமிறங்கி அதிரடியாக விளையாடிய கேப்டன் சஞ்சு சாம்சன் 86 ரன்களிலும் ரியான் பராக் 26 ரன்களிலும் ஆட்டமிழந்தனர். இறுதியில் அணியானது 20 ஓவர்கள் முடிவில் 8 விக்கெட்டுகள் இழந்து 201 ரன்கள் எடுத்தது. பின்னர் டெல்லி அணி 20 ரன்கள் வித்தியாசத்தில் அபார வெற்றி பெற்றது. டெல்லி அணியின் ஆட்டநாயகனாக குல்தீப் யாதவ் தேர்வு செய்யப்பட்டார்.